Gipasabot ni Atty. Oscar “Oca” Moreno nga mas komplikado ang legal nga sitwasyon kalabot sa giingong ICC warrant batok kang Senador Ronald “Bato” dela Rosa, ilabi na samtang adunay pending legal remedies nga gi-file sa iyang kampo ug naghulat pa og tubag ang Korte Suprema.
Sumala sa legal expert, maglisod ang Korte Suprema sa pagpahunong sa posibleng pag-aresto kay ang parliamentary immunity dili mo-apply kung grabe nga kaso sama sa crimes against humanity.
Gipunting usab niya nga kung ang Korte Suprema moingon nga kinahanglan local court order una sa pag-aresto, mahimo kini moresulta og legal nga komplikasyon, apil na ang posibleng pag-question sa miaging mga ICC-related arrests sa nasod.
Dugang pa ni Moreno nga ang pinakaimportante mao ang “rule of law” ug dili ang politikal nga impluwensya o popularidad sa usa ka personalidad.
Matod niya, ang mga desisyon kinahanglan base sa balaod ug dili sa opinyon sa kadaghanan.
Matud sa abogado nga kung matuman ang pagdakop, mahimo kini makaapekto sa balanse sa Senado ug sa posibleng impeachment ug ICC-related proceedings.
Bisan pa niana, wala pa klaro ang final nga posisyon sa Korte Suprema ug sa administrasyon, ug nagpadayon pa ang paghulat sa dugang legal nga desisyon.