MANILA — Giisip ni kanhi Chief Presidential Legal Counsel Salvador Panelo nga usa ka dakong timailhan sa kakahinay sa kaso ang lakang sa House prosecution team sa pagkuha og dugang mga private lawyers alang sa nagsingabot nga impeachment trial ni Vice President Sara Duterte.
Sumala ni Panelo, kung duna’y lig-on ug konkretong ebidensya ang prosekusyon, dili na kinahanglan pa nga dugangan ug palakson ang ilang legal team. Gipasabot sa maong abogado nga walay saktong basehan ang mga alegasyon kalabot sa confidential funds ug giingong ill-gotten wealth aron isipon nga usa ka impeachable offense. Hugot ang pagtuo niini nga mapakyas ang maong reklamo tungod kay ang lunsay nga layunin lamang niini mao ang pagbabag ug pagpahinay sa karera sa pulitika sa Bise Presidente.
Kahinumduman nga una nang gipahibalo sa House prosecution ang pagpuno sa ilang grupo og mga iladong private prosecutors, lakip na si Atty. Theodore Te, isip pagpangandam sa pormal nga pag-abli sa impeachment trial karong Hulyo 6.