Ginamandoan ni Presidente Ferdinand Marcos Jr. ang DILG ug PNP nga mopasabot kung giunsa natigayon ang kalit nga “surprise rally” sa mga miyembro sa Iglesia ni Cristo (INC) sa EDSA Monument nga wala dayon natunugan sa intelligence community.
Matud ni Palace Press Officer Usec. Claire Castro, tinuyo nga gitago sa mga organizer ang plano nga giisip sa Palasyo nga supak sa balaod tungod sa kawalan og permit ug dako nga perwisyo sa trapiko. Bisan pa man niini, nagmando ang Pangulo og maximum tolerance sa mga otoridad samtang padayon nga gimonitor ang sitwasyon alang sa kaluwasan sa mga motorista ug komyuter.
Giklaro usab sa Palasyo nga walay labot ang Presidente sa kasong plunder nga giatubang ni Senator Rodante Marcoleta gumikan sa giingong ₱75-million nga donasyon, tungod kay ang maong usapin anaa na sa hurisdiksyon sa Office of the Ombudsman.