LANTAPAN, BUKIDNON — Sikop sa mga otoridad ang usa ka 39-anyos nga lalaki nga giingong bag-ong nailang drug personality human kini mapaliti og iligal nga droga sa gihimo nga drug buy-bust operation sa Purok 5, Sitio Manalo, Barangay Bantuanon niining lungsod.
Sa hiniusang operasyon sa Lantapan Municipal Police Station sa pamunuan ni PMAJ Anthony Townend, uban ang Bukidnon 1st PMFC ug Provincial Intelligence Unit, narekober gikan sa suspek ang tulo ka sachet sa gidudahang shabu. Muabot ngadto sa 2.15 gramos ang kinatibuk-ang timbang sa maong droga nga duna’y standard drug price nga 14,620 ka pesos, gawas pa sa usa ka 500-peso bill nga gigamit isip buy-bust money.
Gihimo ang physical inventory diha mismo sa dapit diin nahitabo ang transaksyon nga gisaksihan sa usa ka opisyal sa barangay ug representante sa media. Kasamtangang balhog na sa prisoan ang suspek ug ginaandam na ang kasong pagsupak sa Section 5 ug 11 sa Republic Act 9165 kun Comprehensive Dangerous Drugs Act of 2002, samtang ang mga ebidensya gidala na sa Bukidnon Provincial Forensic Unit alang sa laboratory examination.