Wala na gikatingala ni Atty. Virgilio Ligutan ang desisyon sa Quezon City Regional Trial Court Branch 81 nga mibasura sa petisyon ni Mans Carpio nga nagtinguhang mapahunong ang impeachment hearing batok kang VP Sara Duterte.
Matod ni Ligutan, usa sa mga complainant batok sa bise presidente, nagpakita lamang ang desisyon nga walay nalapas nga balaod o proseso ang House Committee on Justice sa ilang gihimong proceedings.
Gipasiugda usab niya nga legal ang gihimong pag-isyu sa subpoena sa panel alang sa records sa magtiayong Duterte ug Carpio, supak sa giingon sa ilang kampo.
Lakip sa mga dokumentong gipangayo sa subpoena mao ang Statement of Assets, Liabilities, and Net Worth o c, bank records, records gikan sa Anti-Money Laundering Council, ug uban pa.
Base sa desisyon sa korte, walay hurisdiksyon ang RTC aron manghilabot sa gahum sa Kamara sa pagpahigayon sa impeachment proceedings subay sa gitakda sa Konstitusyon.
Gipasiugda usab sa hukmanan nga adunay katungod ang House panel sa pagpagawas og subpoena isip kabahin sa mandato nga gihatag niini sa Konstitusyon.