Hugot nga gisupak sa National Citizens’ Movement for Free Elections (NAMFREL) ang pag-oktaba sa Barangay ug Sangguniang Kabataan Elections (BSKE).
Sa pakighinabi sa Bombo Radyo Malaybalay kang Nestor Banuag Jr. Director for Social Involvement and Advocacy Program, mas uyon matud pa ang ilang buhatan sa regular nga pagpahigayon sa BSKE, taliwala sa mga mitumaw nga isyu kalabot pag-usab sa petsa niini.
Gipamugos usab sa NAMFREL nga kinahanglan ang eleksyon mahimong regular, credible ug tukma sa panahon. Matud niini, ang dugang nga pagkalangan sa eleksyon mahimong makaapekto sa demokratikong sistema sa nasud.
Samtang, gibutyag niini nga kapin na sa P8 bilyon ang gigahin sa badyet alang sa Commission on Elections o COMELEC alang sa pagpahigayon sa eleksyon.
Gisulti niini nga ang paggasto alang sa eleksyon dili lamang gasto sa gobyerno, kondili usa usab ka matang sa pagpamuhunan alang sa paggamit sa katungod sa matag botante.
Gipahinumdoman usab sa NAMFREL ang ilang papel isip election watchdog, ilabina sa pag-monitor sa proseso sa eleksyon ug pagpasiugda sa usa ka kasaligan ug transparent nga pagpili sa mga opisyal.
Matud sa grupo, ilang gitan-aw nga ang sunod nga barangay elections kinahanglan ipahigayon sa regular nga panahon ug dili padugayon pa.