Gipasalig karon sa Kongreso ang pagdugang og kapin 2,000 ka guidance personnel sa mga pampublikong tungha-an sa 2027, uban sa gisugyot nga P802 milyon nga pondo alang sa pagpalig-on sa mental health ug child protection services sa mga estudyante.
Matud ni House Minority Leader Marcelino Libanan, gilakip sa gisugyot nga P7.2-trilyon nga national budget alang sa 2027 ang pagmugna og 1,800 school counselor associate positions ug 221 school division counselor positions ubos sa Department of Education kon DepEd.
Gipunting ni Libanan nga importante ang dugang nga counseling personnel ilabina tungod sa mga report sa bullying, school violence ug uban pang problema nga mahimong makaapekto sa emosyonal ug mental nga kahimtang sa mga estudyante.
Dugang pa niini, tukma ang gisugyot nga dugang pondo human sa pipila ka insidente sa mga tungha-an, lakip ang mga pagpusil ug pagpangdunggab sa pipila ka campus.