Misaka na sa 7.5 milyon ka tawo ang naapektuhan sa hiniusang epekto sa mga bagyong Luis, Maymay ug Neneng, ingon man sa habagat, sumala sa National Disaster Risk Reduction and Management Council kon NDRRMC.
Base sa pinakabag-ong datos sa NDRRMC hangtod Agosto 23, katumbas kini sa gibanabanang 2.1 milyon ka pamilya gikan sa Ilocos Region, Cagayan Valley, Central Luzon, Bicol Region, Western Visayas, Zamboanga Peninsula, Cordillera Administrative Region, Metro Manila, Calabarzon ug MIMAROPA. Sa kinatibuk-ang ihap, 9,872 ka pamilya o 34,103 ka indibidwal ang nagpabilin sa mga evacuation center.
Samtang, nagpabilin sa 29 ang ihap sa mga namatay, 19 ang nasamdan ug tulo ang gikataho nga nawala tungod sa epekto sa mga weather disturbance.
Aduna usab 89 ka lugar nga nagpabilin ubos sa state of calamity.
Misaka usab sa gibanabanang P4.9 bilyon ang kadaot sa imprastraktura, samtang P1.7 bilyon ang kadaot sa sektor sa agrikultura.