Gipasabot ni Senator Erwin Tulfo nga kinahanglan manubag ang mga gun owner nga nagpasagad sa pagtipig sa ilang mga armas, ilabi na kung dali kini maabot sa mga bata.
Kini nahitabo human makumpiska ang usa ka armas sa bag sa usa ka Grade 9 nga estudyante sa Cebu, diin ang maong armas gipanag-iya sa iyang apohan.
Nahisgutan kini pipila lang ka adlaw human sa laing school shooting incident sa Ateneo de Zamboanga University, diin duha ka estudyante ang namatay ug siyam ang nasamdan.
Sumala kang Tulfo, nag-andam na ang iyang opisina og sugyot balaodnon nga nagtumong nga mapanubag sa kriminal ang mga tag-iya sa armas nga mapamatud-ang nagpasagad sa ilang armas nga nagamit sa pagpamusil nga insidente.
Giduso sa senador ang panginahanglan nga adunay mas lig-on nga balaod ug sistema sa pagpanag-iya ug pagtipig sa armas aron malikayan ang susamang mga insidente sulod sa mga tungha-an.