Aprobado na sa lokal nga kagamhanan sa Kibawe ang pagpagawas sa fuel subsidy nga mokabat sa P2,000 alang sa mga kwalipikadong drayber ug operators sa lungsod isip dinaliang tabang sa walay hunong nga pagsaka sa presyo sa lana.
Ubos sa maong kamanduan, lakip sa makadawat niini mao ang mga rehistradong drayber, delivery riders, ingon man ang mga sektor sa mag-uuma ug mangingisda, kon makapakita kini og mga dokumento sama sa lisensya, OR/CR, o barangay certification alang sa validation.
Tumong niini nga inisyatiba nga mamenosan ang gasto sa panginabuhian sa mga apektadong sektor samtang giatubang ang krisis sa enerhiya sa nasud.
Dungan niini, gipatuman usab sa LGU ang estrikto nga austerity measures diin temporaryo unang gisuspenso ang mga dagkong panagtapok sama sa pista, lakip na ang barangay ug municipal foundation day.
Kini nga lakang gihimo aron makadaginot ug mapatigbabaw ang pundo alang sa mga prayoridad nga serbisyo, ilabi na sa pagpangandam sa epekto sa nagsingabot nga El Niño phenomenon.