Mukabat sa kapin ₱780,000 nga balor sa gituohang shabu ang nasakmit sa Philippine Drug Enforcement Agency (PDEA) Bukidnon sa gihimong serye sa mga operasyon gikan Enero hangtod Abril ning tuiga. Sa pakighinabi sa Bombo Radyo Malaybalay kang Agent Rodolfo De la Cerna Jr., gibutyag niini nga nakatala sila og unom ka malampusong buy-bust operations nga miresulta sa pagkasakmit sa 114.7 gramo sa shabu ug pagkadakop sa 10 ka drug personalities. Giklaro sa opisyal nga pulos mga hingkod ang nadakpan ug wala’y nalambigit nga mga menor de edad.
Gipasabot ni De la Cerna nga ang matag operasyon moagi sa mabinantayong validation ug surveillance uban ang koordinasyon sa ilang mga confidential informants. Garbo usab niini nga gipahibalo nga wala’y natala nga kaso sa “nanlaban” sa maong mga operasyon tungod sa paggamit sa mga otoridad sa saktong “reasonable force” alang sa kaluwasan sa tanan.
Sa pagkakaron, 376 na sa 464 ka barangay sa Bukidnon ang gideklarang drug-cleared. Samtang nagpadayon ang monitoring sa PDEA, gipaniguro sa ahensya nga wala pay politiko nga nalambigit sa ilegal nga droga sa probinsya sa karon. Nanawagan ang PDEA sa publiko nga magpabiling mabinantayon ug padayon nga makigtinabangay aron hingpit nga mapatunhay ang kalinaw ug kahusay.