Nagpaabot og dakong “pasabog” ang House prosecution team sa sunod nga semana pinaagi sa pagpresenta og mas lig-on nga mga ebidensya sa nagpadayong impeachment trial batok kang Bise Presidente Sara Duterte.
Gibutyag ni House prosecution legal spokesperson Atty. Benhamin Tolosa nga sa pagpadayon sa pagdungog sa Article 4 kon grave threats charge, gilaumang moatubang isip mga testigo si National Bureau of Investigation (NBI) Director Matibag ug usa ka regional director. Sila ang mosaysay sa gihimong imbestigasyon sa NBI kalambigit sa giingong pagbahad ni VP Sara sa kinabuhi ni Presidente Ferdinand Marcos Jr., First Lady Liza Marcos, ug kanhi House Speaker Martin Romualdez. Dili pa hinuon mabutyag ang tibuok detalye sa pagkakaron tungod sa gipatuman nga sub judice rule.
Sa pikas bahin, nanawagan si Presidente Marcos Jr. nga kinahanglang sundon ang balaod ug ang saktong proseso sa maong pagbista sa Senado. Sumala ni Palace Press Officer Undersecretary Claire Castro, nakita sa Palasyo nga hapsay ug patas ang dagan sa impeachment court. Hinuon, mibalibad ang Malacañang sa paghatag og assessment o komento sa mga ebidensya nga naipresenta sa unang tatlong adlaw tungod kay dili matud pa kini mandato sa ehekutibo kondili trabaho kini sa Senado ug katungod sa taong-bayan nga mag-monitor sa kamatuoran.