Gipadayag sa National Bureau of Investigation (NBI) sa ikawalong adlaw sa impeachment trial ni Vice President Sara Duterte sa Senado nga nakaila na kini og mga persons of interest nga posibleng makatabang sa imbestigasyon kalabot sa giingong plano batok kang Pangulong Ferdinand “Bongbong” Marcos Jr.
Sumala sa testimonya ni NBI Director Melvin Matibag, dili na lamang kini yano nga hulga kundi usa na ka aktibo ug planadong pagpatay sa Presidente. Gitan-aw usab sa NBI ang posibilidad sa sabwatan human nagpagawas og bahad sila si VP Sara ug Davao City Mayor Baste Duterte nga parehong naghisgot sa pagkuha sa ulo sa Presidente, gawas pa sa gipresentar nga pahayag sa self-confessed Davao Death Squad member nga si Arturo Lascañas kalabot sa giingong koneksyon sa Bise Presidente sa Oplan Tokhang.
Apan gihatagan og diin sa defense team ni VP Sara ug ni Senator Pia Cayetano nga dili dawaton ang affidavit ni Lascañas tungod kay wala kini notarismo ug pirma, hinungdan nga maisip lamang kini nga yano nga papel.
Sa pikas bahin, binalikan ni Senator Raffy Tulfo ang kaso sa usa ka magtutudlo nga gidali-dali kaniadto sa pagdakop human nihulga batok sa kanhi Presidente Rodrigo Duterte. Agi’g tubag, gipahimug-atan ni Matibag nga bisan pa man sa taas nga public trust rating o posisyon, wala’y si kinsang opisyal ang adunay exemption o kagawasan gikan sa imbestigasyon ug pagpanubag kon nalambigit sa alegasyon sa krimen.