Top 3 Most Wanted sa Malaybalay nga atubangay og kasong pagpanglugos, sikop sa operasyon sa kapulisan

Arestado sa gipahigayong joint police operation ang usa ka 18-anyos nga lalaki nga nalakip isip Top 3 Most Wanted Person (MWP) sa city level sa dakbayan sa Malaybalay.

Giila ang suspek nga si Cristian Cartajena Baconguis, residente sa Barangay Linabo sa maong dakbayan. Nasikop ang suspek didto sa Purok 4, Barangay Sumpong, pasado alas-5:25 sa hapon niadtong Hulyo 20, 2026.

Nahitabo ang pag-aresto subay sa gipagawas nga warrant of arrest batok sa suspek alang sa kasong pagpanglugos nga walay girekomendang piyansa.

Sa kasamtangan, gidala na sa Malaybalay City Police Station ang suspek alang sa dokumentasyon ug hapsay nga disposisyon sa iyang kaso.