Gikuwestiyon sa defense team ni Vice President Sara Duterte ang kredibilidad ug personal nga kahibalo ni NBI Director Melvin Matibag atol sa ikawalong adlaw sa impeachment trial sa Senado, lakip na ang pagtestigo niini nga giingong walay pormal nga subpoena.
Apan gipatin-aw sa hepe sa NBI nga pormal siyang miatubang sa impeachment court subay sa subpoena nga gipagawas mismo sa korte ug pinaagi sa imbitasyon sa prosecution panel.
Gipasabot ni Matibag nga bukas ug continuing pa ang imbestigasyon, hinungdan nga kinahanglan nilang panalipdan ang seguridad sa ilang mga informants ug sources aron dili makompromiso ang imbestigasyon sa task force.
Sa cross-examination ni Atty. Mark Vinn Luart, gisulayan niining gub-on ang kaalaman sa testigo sa unang imbestigasyon niadtong Nobyembre 2024 sanglit Pebrero 2026 lamang kini gitudlo isip hepe sa NBI. Giisip sa depensa nga “hearsay” o “tsismis” lamang ang pahayag kon walay personal nga kahibalo, apan gipatin-aw ni Matibag nga adunay mga exception ang maong lagda ug wala gayod gigamit sa korte ang pulong nga “tsismis” alang sa hearsay.
Gisukna usab ang pagpirma sa iyang asawa nga si Congresswoman Ann Matibag sa impeachment complaint, apan giinsistir sa NBI Director nga walay kalabotan ang aksyon sa iyang asawa sa pormal nga imbestigasyon sa ahensya.
Agi’g tubag sa pangutana ni Senator Bam Aquino sa pagtapos sa sesyon, gipahayag ni Matibag nga 100 porsiyento siyang nakasiguro nga adunay tawo nga nakigsulti sa Bise Presidente. Gipasabot sa NBI Chief nga gikan mismo kini sa gipahayag ni VP Sara sa iyang press conference nga may gihangyo kini ug miuyon sa giingong plano batok sa Presidente.