Padayon ang pagmonitor sa misyon sa Artemis II mission, diin gilauman nga matapos ang operasyon karong Abril 11 (oras sa Pilipinas), uban sa planong luwas nga splashdown sa spacecraft sa kadagatan duol sa California.
Human sa kapin siyam ka adlaw sa kawanangan, magbulag ang Orion crew module nga sakay ang mga astronaut gikan sa service module sa dili pa mosulod sa atmosphere sa Earth.
Ang service module gilauman nga masunog sa pagsulod niini, samtang ang crew capsule mobalik sa Earth nga luwas.
Sa pag-reentry sa atmosphere, masinati sa mga astronaut ang grabe nga kainit ug puwersa nga hapit upat ka beses sa normal nga gravity.
Temporaryo usab nga maputol ang komunikasyon sulod sa mga unom ka minuto tungod sa plasma nga moputos sa spacecraft.
Human niini, moabli ang mga parachute aron mapahinay ang paglusad sa capsule sa dagat, diin maghulat ang U.S. Navy alang sa rescue operations.
Gilauman nga madala dayon ang mga astronaut sa medical bay sulod sa duha ka oras human sa landing.
Gibantayan og higpit sa NASA ang reentry tungod sa mga isyu sa heat shield sa miaging Artemis I mission, busa giusab ang pipila ka pamaagi aron mapakunhod ang grabe nga kainit.
Bisan pa og adunay gamay nga helium leak sa propulsion system, matud sa mga opisyal nga wala kini nakaapekto sa kinatibuk-ang kalampusan sa misyon.
Sumala sa NASA, kampante sila sa kaluwasan sa sistema, ug ang malampusong pagbalik sa Artemis II usa ka importante nga lakang padulong sa umaabot nga mga misyon paingon sa bulan.