Lig-on gihapon ang House prosecution panel nga makab-ot ang pagkahukom batok kang Vice President Sara Duterte pinaagi sa alegasyon sa unexplained wealth, bisan pa sa ilang desisyon nga i-withdraw ang tulo ka artikulo sa impeachment.
Matud ni House prosecution spokesperson ug Lanao del Sur First District Representative Zia Alonto Adiong, igo na ang pagkakombikto sa usa ka artikulo aron matangtang sa puwesto ang bise presidente.
Gipasabot usab niini nga gikonsiderar sa panel ang posibilidad nga molungtad hangtod sa unang kwarter sa sunod tuig ang impeachment trial.
Gipunting ni Adiong nga ang mga dokumento gikan sa Anti-Money Laundering Council, Bureau of Internal Revenue ug mga bangko maoy basihan sa ilang alegasyon nga adunay kalainan tali sa mga rekord sa pinansyal ug Statement of Assets, Liabilities and Net Worth (SALN) ni Duterte.
Gilauman usab sa prosecution panel nga ipatin-aw sa depensa ang mga alegasyon sa wala hingpit nga pagdeklarar sa kabtangan ug interes sa negosyo, lakip ang giingong pagdawat og suweldo gikan sa Davao City samtang nagserbisyo isip bise presidente.
Gisalikway usab ni Adiong ang pahayag nga politikanhong pagpanglutos ang impeachment batok kang Duterte, ug miingon nga tumong sa proseso ang pagpangayo og tulubagon sa mga opisyal sa gobyerno.