Nagpadayon karon ang gihimong lawom nga imbestigasyon sa kapulisan human mapalgi ang duha ka patay’ng lawas sa Purok 6, Barangay Palacapao, Quezon, Bukidnon takna sa alas 4:30 sa hapon niadtong Hulyo 3, kagahapong adlawa.
Sa pakighinabi sa Bombo Radyo Malaybalay kang PCPT. Sheila Joy P. Jangad, ang tigpamaba sa Bukidnon Police Provincial Office (BPPO), gibutyag niini nga daling gi-proseso sa Scene of the Crime Operatives (SOCO) ang dapit diin nakita ang mga biktima ug sa pagkakaron, nagpaabot pa sila sa opisyal nga resulta sa gihimong pagsusi aron masuta ang hinungdan sa kamatayon sa duha.
Dugang pa sa opisyal, kasamtangan pa nga ginasusi sa Scene of the Crime Operatives (SOCO) ang crime scene diin napalgan ang mga patay’ng lawas ug nagapangandam na sila sa paggawas sa opisyal nga resulta sa forensic examination.
Subay sa imbestigasyon, nasayran nga nakatagamtam og mga samad-pinusilan ang mga lawas sa duha ka biktima nga giingong manag-live-in partner. Kini ang hinungdan nga dako ang pagtuo sa kapulisan nga adunay nahitabong “foul play” sa maong insidente.