Gibarugan ni House Prosecution Spokesperson ug Lanao del Sur Representative Zia Alonto Adiong nga ang unmodified audit opinion nga gihatag sa Commission on Audit (COA) alang sa 2025 dili nagpasabot nga nahunong o napapas na ang mga isyu nga may kalabotan sa paggamit sa confidential funds sa Office of the Vice President (OVP) sa miaging mga tuig.
Matod ni Adiong, nagpabiling lig-on ang mga ebidensya sa prosecution alang sa tanang Articles of Impeachment, ilabina ang mga alegasyon sa giingong sayop nga paggamit ug liquidation sa confidential funds.
Gipasabot usab ni Adiong nga lahi ang audit opinion alang sa 2025 ug wala kini motubag sa mga naunang findings sa COA, lakip ang rekomendasyon nga ibalik ang mga kantidad nga giila nga kuwestiyonable.
Gipunting usab ni Adiong ang mga isyu nga may kalabotan sa acknowledgement receipts nga gisumite sa OVP ug ang kontrobersyal nga ngalan nga “Mary Grace Piattos” nga migawas sa pipila ka dokumento.
Dugang pa niini, nga ang mga isyu kinahanglan matuki ug mapatin-aw pinaagi sa mga testimonya ug ebidensya atol sa impeachment trial.