Gipalapdan sa Department of Social Welfare and Development (DSWD) Region 10 ang mga programa niini aron mas mapatuman ang dinalian ug de-kalidad nga serbisyong sosyal alang sa mga nanginahanglan ug vulnerable sectors sa rehiyon.
Sumala ni Roshiel M. Galia, ang Regional Information Officer sa DSWD-X, nagpabiling anaa sa kasingkasing sa ahensya ang pagtabang sa mga kababayen-an ug kabatan-onan nga biktima sa pag-abuso, pagpasagad, ug Violence Against Women and Children (VAWC) pinaagi sa ilang mga pinasahi nga centers, pasilidad ug uban pang mga programa.
Dugang pa, gihatagan usab ug pagtagad ang pag-apod-apod sa pensyon alang sa mga indigent senior citizens ug ang hugot nga pakig-alayon sa mga lokal nga pangagamhanan (LGUs) sa pag-monitor ug pagpanalipod sa katungod sa mga solo parents, Persons with Disabilities (PWDs), ug mga persons living with HIV.
Gisaysay usab ni Galia, nga adunay pipila ka mga bag-ong programa ug serbisyo ang namugna sa ahensya ubos sa administrasyon ni Presidente Ferdinand “Bongbong” Marcos Jr. ug Sec. Rex Gatchalian, lakip na ang Walang Gutom Food Stamp Program ug ang Tara Basa Tutoring Program para sa edukasyon.