Usa ka 16 anyos nga lalaki ang giakusahan og kasong frustrated homicide human niini gidunggab ang iyang 21 anyos nga kauban tungod sa panaglalis nga may kalabotan sa sigarilyo.
Ang insidente nahitabo pasado alas 11:00 sa gabii niadtong milabay’ng adalaw sa Purok 9, Barangay Managok, Malaybalay City.
Ang biktima, nga giila nga si Arche R. Alobog, nakaangkon og mga samad sa lawas apan anaa na sa luwas nga kahimtang ug padayon nga nagpaayo sa Bukidnon Provincial Medical Center.
Sa inisyal nga imbestigasyon sa kapulisan, nasayran nga nagtapok ang suspek ug ang biktima sa usa ka tindahan ug videokehan sa wala pa ang panghitabo. Sa dihang nangayo og sigarilyo ang suspek ug wala kini tagda sa biktima, misangpot kini sa panaglalis.
Apan sa pagbiya sa biktima gikan sa lugar, kalit kining gisulong ug gidunggab sa suspek.
Gikatahong gigukod pa sa suspek ang biktima bisan pa man sa pagsulay niini sa pag-ikyas. Gilayon nga miresponde ang mga barangay tanod ug gidala ang biktima ngadto sa ospital alang sa pagtambal.
Samtang, nadakpan usab ang menor de edad nga suspek ug gitugyan sa Malaybalay City Police Station alang sa tukmang disposisyon
Sa pagkakaron, anaa na sa kustodiya sa Women and Children Protection Desk ang suspek samtang gipadayon sa mga otoridad ang angay nga legal nga proseso batok kaniya.