Gipaila sa Police Regional Office-10 (PRO-10) ang “Run. Hide. Fight.” Shooter Response Protocol, usa ka estratehiya nga nagtumong sa pag-andam sa publiko kon adunay aktibong pagpamusil o armed attack.
Gipakusgan sa maong buhatan ang pakigtambayayong sa mga kadagkoan sa tunghaan sa rehiyon aron ipatuman ang mga lakang sa seguridad batok sa kapintasan, ilabi na ang pagtudlo sa mga estudyante ug magtutudlo sa iladong active shooter response protocol.
Matud ni PBGEN Christopher N. Abrahano, Regional Director sa PRO 10, kini nga lakang nahiuyon sa kamandoan ni Chief Jose Melencio Nartatez aron masiguro nga andam ang sektor sa edukasyon sa bisan unsang hulga sa maong matang sa krimen.
Gihatagan og gibug-aton ni Abrahano nga magdepende ang disenyo sa seguridad sa nahimutangan sa tunghaan, anaa man kini sa mga highly urbanized cities o sa mga layong barangay sa Northern Mindanao.
Lakip usab sa gipanghingusgan nga seguridad ang regular nga pagpatrolya ug ang pagtambong sa mga nadestinong pulis sa mga flag raising ceremony matag adlawng Lunes.