Giatake sa Islamic Revolutionary Guard Corps (IRGC) sa Iran ang mga base militar sa Estados Unidos (US) nga nahimutang sa nasod sa Kuwait ug Bahrain pinaagi sa usa ka hiniusang pagpamaril gamit ang mga drone ug missile.
Matod sa taho, kini nga aksyon gihimo sa Iran isip balos sa serye sa mga pag-atake sa Amerika sa ilang mga probinsya sa habagatan ug sa duha ka tulay sa silangang bahin sa maong nasod.
Gikumpirma sa Navy ug Air Force sa IRGC nga gipunting sa ilang operasyon ang mga imprastraktura ug pasilidad sa Amerika. Lakip sa mga naigo mao ang Camp Arifjan ug Ali Al Salem Air Base sa Kuwait, ingon man ang Shaikh Isa Air Base ug Juffair sa Bahrain, diin nahimutang ang nag-unang US Navy base sa Persian Gulf nga maoy nag-host sa iladong US Fifth Fleet.
Sa pagkakaron, wala pa’y gipagawas nga opisyal nga detalye gikan sa mga otoridad kung duna ba’y naangol o namatay tungod sa nahitabong pag-atake.