Gipasakaan og kaso sa mga otoridad sa Mexico ang usa ka mayor nga giakusahan sa pagpeke sa iyang kaugalingong kidnapping aron matabonan ang giingong pagkawala sa minilyon ka pisong pondo sa ilang lungsod.
Sumala sa imbestigasyon, si Mayor Nancy Napoles ug ang iyang pamilya giingong nakigkunsabo sa mga suspetsado aron himuon ang peke nga kidnapping ug gamiton kini isip rason sa pagkuha sa P40 milyon nga ransom nga ingon kuhaon gikan sa kaban sa munisipyo.
Nadiskobrehan usab sa mga otoridad ang kapin 150 ka tawag tali sa pamilya sa mayor ug sa mga suspetsado.
Apan, gipanghimakak ni Napoles ang mga alegasyon ug giingong kabahin lamang kini sa usa ka sabwatan aron gub-on ang iyang karera sa politika.
Sa pagkakaron, gipangita na sa mga otoridad ang bana ug igsoon sa mayor, samtang si Napoles ug ang iyang mga giingong kakunsabo nga mag-atubang og posibleng silot nga hangtod 16 ka tuig nga pagkabilanggo kon mapamatud-ang sad-an.