Nagsidaan ang Bangko Sentral ng Pilipinas (BSP) sa publiko batok sa walay pagtugot nga pag-print, pag-photocopy, ug pag-reproduce sa mga Philippine banknotes, human mikaylap sa social media ang mga hulagway nga nagpakita sa pagkopya sa kuwarta.
Sumala sa BSP, subay sa Circular No. 829, Series of 2014, gidili ang pag-reproduce sa mga imahe sa salapi gawas lamang kon adunay opisyal nga pagtugot gikan sa bangko sentral.
Ang mga molapas sa maong lagda mahimong atubangon og silot nga pagkabilanggo gikan sa lima hangtod napulo ka tuig.
Gipasabot usab sa BSP nga ang pag-reproduce sa banknotes mahimong tugotan alang lamang sa edukasyonal, historikal, ug uban pang lehitimong katuyoan, basta mosunod kini sa mga lagda ug dili magamit sa pagpamintal o pagpameke sa kuwarta.
Ang maong lakang kabahin sa kampanya sa BSP aron mapugngan ang counterfeiting ug mapanalipdan ang integridad sa salapi sa Pilipinas.