Giklaro ni Malaybalay City Mayor Jay Warren Pabillaran nga wala pa makadawat ang iyang opisina og opisyal nga reklamo kalabot sa giingong kickback nga naglambigit sa pipila ka opisyal sa barangay sa dakbayan.
Sa pakighinabi sa Bombo Radyo Malaybalay, gipadayag sa alkalde nga pinaagi lamang sa social media iyang nahibaloan ang kontrobersiya nga unang gibutyag ni Konsehal Jason Ayala.
Matod ni Pabillaran, gikinahanglan ang pormal nga reklamo ug konkretong ebidensiya aron adunay ligal nga basihanan sa paglihok batok sa mga giakusahan.
Gipasabot usab niini nga ang Quasi-Judicial Committee maoy angay moklaro kon adunay opisyal nga reklamo ug magpatuman sa hustong proseso, lakip ang pagpahibalo sa mga nalambigit ug pagpahigayon og pagdungog.
Sa laing bahin, giawhag sa alkalde ang publiko ug media nga likayan ang pagpakaylap sa wala pa mapamatud-ang mga alegasyon aron dili madaot ang dungog sa mga opisyal nga posibleng walay kalabotan sa kontrobersiya.