Gipahibalo sa Philippine Atmospheric, Geophysical and Astronomical Services Administration kon PAGASA nga bisan og mas gamay ang ihap sa mga bagyo nga gipaabot nga mosulod sa nasud panahon sa giingong “super” El Niño, dako ang posibilidad nga kini mahimong mas kusog ug mas makadaot.
Matud ni Ana Liza Solmoro-Solis, hepe sa Climate Monitoring and Prediction Section sa PAGASA, mosaka ang tsansa nga mahimong delikado ang mga bagyong maporma kon anaa ang hulaw.
Sa pagkakaron, wala pa’y El Niño sa Pilipinas, apan gipaabot sa maong buhatan nga masinati ang grabe nga epekto niini sa katapusang bahin sa tuig 2026.
Ang El Niño usa ka natural nga panghitabo diin moinit ang temperatura sa dagat sa Pasipiko, nga moresulta sa mas taas nga ting-init, kakuwang sa ulan, ug pagbag-o sa dagan sa mga bagyo.
Tungod niini, nanawagan ang Philippine Atmospheric, Geophysical and Astronomical Services Administration sa mga lokal nga kagamhanan ug sa katawhan nga mangandam na karon pa lang sa posibleng epekto sa mas kusog nga mga katalagman.