Gideklara sa Bukidnon Police Provincial Office (BPPO) nga nagpabiling malinawon ug hapsay ang tibuok dagan sa seguridad sa bag-ohay lang nahuman nga Kaamulan Festival 2026.
Sa pakighinabi sa Bombo Radyo Malaybalay, gipahayag ni PCpt. Sheila Joy Jangad, ang tigpamaba sa BPPO, nga walay naitalang bisan unsang seryosong insidente atol sa sunod-sunod nga dagkong kalihokan, lakip na ang gipaabot nga street dancing ug mga concert sa Malaybalay City. Matud ni Jangad, kini resulta sa epektibong deployment sa kapulisan ug hugot nga pagbantay sa nagkadaiyang venues.
Luyo niini, duna ray pipila ka gagmayng insidente sama sa mga bata nga nataliwan o natigbulag sa ilang mga ginikanan ug mga nawad-an og pitaka, apan dinaliang naresolba pinaagi sa gipahimutang nga command post. Gipasalamatan sa kapulisan ang komunidad sa gipakitang kooperasyon nga miresulta sa usa ka malampuson ug luwas nga selebrasyon alang sa tanang partisipante ug mga bisita.