Andam ang Malaybalay City Water District (MCWD) nga angkonon pagbalik ang responsibilidad sa pagdumala sa serbisyo sa panubig ning syudad human nga mipadayag ang PrimeWater Infrastructure Corp, sa posibilidad nga buhian ang ilang operasyon dinhe sa dakbayan.
Matud ni MCWD General Manager Eng. Nolito Binahon, andam na sila sa tanang panahon gikan sa manpower, kagamitan, hangtod sa customer service, aron masiguro ang serbisyo sa panubig sa mga konsumedor sa tibuok Malaybalay.
Gipaniguro sa MCWD nga mopatuman sila og mas transparent nga sistema, lakip na ang regular nga pag-update sa publiko kabahin sa supply status, water quality monitoring, ug mga proyekto nga ilang mapatuman aron mapalambo pa ang serbisyo.
Lakip sa mga plano sa MCWD mao ang rehabilitasyon sa mga linya sa tubig, pagdugang og mga water source, ug pagbansay balik sa ilang mga empleyado alang sa mas epektibong pagserbisyo.
Sa pagkakaron, padayon ang coordination sa duha ka ahensya aron masiguro nga hapsay ang transition gikan sa PrimeWater balik ngadto sa Malaybalay City Water District.
Mahidumduman nga unang gibutyag ni former senator Cynthia Villar nga plano sa ilang pamilya nga ibaligya ang ang prime water tungod sa mga kontrobersiya nga giatubang lakip nga gigamit kini sa politika batok kanila.