Gipasalig sa Malacañang nga lig-on ug andam ang administrasyong Marcos sa pag-atubang sa bisan unsang hulga sa seguridad sa nasud, lakip na ang mga giingong plano nga kudeta o mga destabilization effort batok sa gobyerno. Matod ni Presidential Communications Office (PCO) ug Palace Press Officer Undersecretary Claire Castro, naka-alerto ang tanang ahensya sa gobyerno aron mapadayon ang kalig-on ug kalinaw sa nasud. Gipahimangnoan usab sa opisyal ang publiko nga dili magpailad sa bakak nga impormasyon ug unahon ang pagpanukiduki sa tinubdan sa impirmasyon. Ang maong pahayag ni Castro mao’y tubag sa mga nagsubong ispekulasyon nga posibleng mausab sa Pilipinas ang nahitabo sa Myanmar diin adunay kudeta batok sa gobyerno.
Gipunting sa Palasyo nga padayon nga lig-on ug matinud-anon ang administrasyon ni Presidente Ferdinand R. Marcos Jr. sa pagpatuman sa mga programa alang sa kalinaw, kalamboan sa nasud. Sa laing bahin, gipahayag usab sa Malacañang nga dili gayod moatras ang gobyerno sa pagpanalipod sa teritoryo sa Pilipinas, taliwala sa padayon nga agresibong lihok sa China sa West Philippine Sea.
Sumala ni Undersecretary Castro, klaro ang direktiba sa Presidente nga “dili isurender sa Pilipinas bisan usa ka pulgada sa maong teritoryo.” Gisuportahan kini sa Department of National Defense (DND) pinaagi sa pagpalig-on sa abilidad ug katakos sa Armed Forces of the Philippines, aron mas maprotektahan ang nasud batok sa nagkalain-laing hulga. Bisan pa sa mga hagit, mibarug ang Palasyo nga magpabilin lig-on, malinawon, ug andam ang Pilipinas sa pagpanalipod sa katawhan ug sa teritoryo niini.