Managlahing operasyon batok sa iligal nga droga ang gilusad sa kapulisan sa Bukidnon niadtong Sabado sa gabii, Hulyo 18, 2026, diin miresulta sa pagkasikop sa duha ka suspetsado ug pagkasakmit sa hapit 30 mil pesos nga kantidad sa shabu.
Unang nadakpan sa Purok 1, Barangay Capitan Juan, Lantapan ang usa ka 19-anyos nga lalaki kinsa giila isip usa ka newly identified drug personality. Narekober gikan kaniya ang tulo ka pakete sa gidudahang shabu nga motimbang og 2.16 gramos ug nagkantidad og kapin 14 mil pesos (Php 14,688.00).
Paglabay sa kapin usa ka oras, malampuson sab nga nasikop sa Sitio San Roque, Barangay San Antonio, Talakag si alyas “Pol,” 33-anyos, human nakuhaan og tulo ka pakete sa shabu nga motimbang og 2.1 gramos ug nagkantidad og kapin 14 mil pesos (Php 14,280.00).
Ang maong mga operasyon gipahigayon sa hiniusang pwersa sa Lantapan ug Talakag Municipal Police Stations, kauban ang 1st Bukidnon Provincial Mobile Force Company ug Provincial Intelligence Unit ubos sa pagdumala ni Bukidnon PPO Director Police Colonel Oliver Sotto Navales. Ang duha ka dinakpan kasamtangan nang nagtingkagol sa selda sa kapulisan ug gihandaan na og kasong paglapas sa Republic Act 9165.