Gideklarar ni Taiwanese President Lai Ching-te nga dili gyud “ibaligya” o isakripisyo ang Taiwan, dungan sa iyang pag-awhag sa Amerika nga ipadayon ang pagbaligya og mga armas ngadto kanila aron mapadayon ang kalinaw sa rehiyon.
Ang pamahayag ni Lai migawas human nagkanayon si US President Donald Trump nga ang pagbaligya og armas sa Taiwan mahimo niyang gamiton isip usa ka maayong “negotiating chip” o baraha sa pakig-istorya niini sa China, nga dugay nang nag-angkon sa maong isla. Bag-o lang nahuman ang pagbisita ni Trump sa Beijing diin gihangyo siya ni Chinese President Xi Jinping nga dili suportahan ang Taiwan.
Matud ni Lai, isip usa ka dako nga gahum sa kalibutan sa natad sa AI technology ug semiconductor chip manufacturing, ang Taiwan anaa sa pinaka-sentro sa interes sa kalibutan busa dili kini angay himuong pangwarta o pambaylo sa negosasyon.