Upat ka tawo ang namatay ug laing 21 ang nangaangol human gilusad sa Ukraine ang giingong “labing dako” nga drone attack batok sa Moscow ug pipila ka rehiyon sa Russia sulod sa kapin usa ka tuig.
Matud sa Russian Defense Ministry, na-intercept ug naguba sa ilang air defense systems ang 556 ka mga Ukrainian drones nga gipalupad sa nagkalain-laing dapit sa nasod, lakip na sa rehiyon sa Moscow, Belgorod, ug Kursk. Gibutyag ni Moscow Mayor Sergey Sobyanin nga 81 ka drone ang gitarget sa kaulohan, diin tulo ang namatay sa rehiyon sa Moscow ug usa usab ang nakalas sa Belgorod.
Gideklarar ni Ukrainian President Volodymyr Zelensky nga “hingpit nga makatarunganon” ang maong pag-atake isip balos sa gihimo sa Russia kaniadto sa Kyiv nga nikalas og 24 ka kinabuhi, diin gipahibawo sa Ukraine nga napasilaob usab nila ang pipila ka mga pasilidad sa lana sa Russia.