Nagpasidaan ang Department of Agriculture o DA ngadto sa mga rice retailers, traders, ug importers nga molapas sa gipahamtang nga price ceiling sa gobyerno alang sa imported rice nga ₱50 kada kilo.
Sumala sa ahensya, mahimo silang maatubang og bug-at nga silot lakip ang milyon-milyong multa, pagkabilanggo, ug posible nga pagsira sa ilang negosyo.
Matud ni Agriculture Secretary Francisco Tiu Laurel Jr., ang bag-ong ipatuman nga price ceiling mas istrikto tandi sa una nga maximum suggested retail price nga nagsalig lamang sa boluntaryong pagsunod sa mga negosyante.
Ubos sa bag-ong sistema, adunay gahum ang DA sa pagpahamtang og silot batok sa mga molapas niini.
Gipatuman ni Presidente Ferdinand Marcos Jr. ang ₱50 kada kilo nga price cap sa imported rice sa tibuok nasud sulod sa 30 ka adlaw, gawas kon palugwayan o bawion kini base sa rekomendasyon sa National Price Coordinating Council o NPCC.
Ubos sa Price Act o Republic Act No. 7581, ang mga molapas sa gitakdang price ceiling mahimong mapriso gikan usa hangtod napulo ka tuig ug mapamultahan gikan ₱5,000 hangtod ₱1 milyon, o pareho.
Posible usab silang maatubang og administratibong silot sama sa temporaryo o permanenteng pagsira sa negosyo, pagkumpiska sa mga produkto, ug pagsuspenso o pagbawi sa mga lisensya ug permit.
Gipadayag usab sa DA nga mahimong adunay personal nga liability ang mga opisyal o empleyado sa kompaniya nga molapas sa balaod.
Samtang, palig-onon sa monitoring teams sa DA ang inspeksyon sa mga pampublikong merkado, supermarket, ug rice retail outlets sa tibuok nasud sulod sa 30 ka adlaw nga implementasyon sa price ceiling.
Gipasabot usab sa ahensya nga posible pang usbon, palugwayan, o tangtangon ang price ceiling human sa evaluation, samtang tumong niini nga maprotektahan ang mga konsumidor batok sa sobra nga pagsaka sa presyo ug profiteering.