Liboan ka mga drones gilusad sa Ukraine batok sa Russia

Gipaulanan sa Ukraine og liboan ka drones ang nagkalain-laing target sa palibot sa Moscow, Russia, diin kapin 200 niini ang miigo sa nagkalain-laing dapit sa maong lugar.

Tungod niini, 17 ka tawo ang natala nga nasamdan sa maong pag-atake. Sumala sa Russian Defense Ministry, anaa sa 1,000 ka drones ug upat ka cruise missiles nga gilusad sa Ukraine ang ilang napugngan ug napukan.

Naigo usab ang usa ka oil depot sa southern Rostov diin usa ka tawo ang namatay. Matud ni Ukrainian President Volodymyr Zelenskyy, gihimo ang maong operasyon isip panimalos sa giingong pag-atake sa Russia niaging semana.

Giila kini nga usa sa labing kusog nga airstrike campaign sa Ukraine batok sa Russia sulod sa halos upat ka tuig nga gubat tali sa duha ka nasud.