Napili isip district mayor sa Queropalca, Peru, ang 45-anyos nga si Hitler Mussolini Simeon Flores, nga nakadani sa atensyon sa internasyonal tungod sa iyang talagsaong ngalan.
Sumala sa report, nakakuha si Flores og 229 ka boto, o 25 ka boto nga labaw sa iyang kaatbang.
Midagan siya ubos sa partido nga Ahora Nación sa lokal nga eleksiyon. Gikumpirma sa opisyal nga profile sa kandidato sa Peru’s Jurado Nacional de Elecciones ang iyang tibuok ngalan.
Apan, walay impormasyon nga nagpakita nga may kalabotan ang iyang mga panglantaw sa politika sa mga diktador sa Europe nga sila Adolf Hitler ug Benito Mussolini.
Dili usab kini ang unang higayon nga adunay kandidato nga ginganlag Hitler nga napili isip mayor sa Peru. Niadtong 2018, midaog usab si Hitler Guesclin Alba Sánchez sa pagka-mayor sa Yúngar.