Patay ang duha ka drayber sa motorsiklo samtang naangol ang usa ka pasahero sa nahitabong panagbangga sa National Road, Purok 6, Barangay Puntian, Quezon, Bukidnon, alas 5:50 sa buntag karong Huwebes, Oktubre 22, 2026.
Giila ang mga namatay nga sila si Elmer A. Parba, 51 anyos, residente sa Davao City, ug Daren M. Bacoy, 29 anyos, residente sa Valencia City, Bukidnon. Ang duha gideklarang dead on arrival sa ospital.
Samtang, naangol ang pasahero ni Parba nga si Josephine J. Teñajora, 43 anyos, ug kasamtanagang nagpaalim sa balay-tambalanan.
Base sa inisyal nga imbestigasyon ug mga pahayag sa mga nakasaksi, posibleng nakasulod sa pikas lane ang motorsiklo ni Bacoy ug maoy hinungdan sa banggaay.
Padayon pa ang imbestigasyon sa kapulisan, samtang gidala na sa Quezon Municipal Police Station ang duha ka motorsiklo alang sa dugang nga pagsusi.