IMPASUG-ONG, BUKIDNON — Gikumpirma sa Impasug-ong Municipal Police Station nga ang 34-anyos nga si Melvin Lora, nga namatay human miambak sa Atugan Bridge sa Impasug-ong, Bukidnon, giila usab nga pangunahing suspek sa pagpatay sa iyang live-in partner didto sa lungsod sa Libona.
Sa usa ka pakighinabi sa Bombo Radyo Malaybalay kay PCPT Keir Jhon R. Hallasgo, Hepe sa Impasug-ong MPS, gipahayag niini nga miambak si Lora gikan sa Atugan Bridge pasado alas-6:00 sa gabii kagahapon, Agosto 9, 2026. Paspas nga narekober ang iyang lawas sa dapit nga yuta duol sa usa ka umahan sa ubos nga bahin sa taytayan.
Gidugang ni PCPT Hallasgo nga nakit-an sa giwanang motorsiklo ni Lora ang usa ka sulat nga adunay gipadayag nga mensahe nga nagpasabot sa iyang pagtinguha nga “moapas” sa iyang ka-live-in partner.
Sa kasamtangan, padayon ang pakig-alayon ug koordinasyon sa Impasug-ong PNP ug Libona Police Station aron pormal nga beripikahon ang mga alegasyon ug ebidensya nga si Lora ang nagpatay sa iyang kapikas nga si Fritz Quijada, kansang nadugta nang lawas nakaplagan niadtong Agosto 3 sa usa ka sapa sa Barangay Poblacion, Libona.
Dungan niini, gipadayag ni Hallasgo nga padayon ang pagpaimbestigar ug pagbantay sa Atugan Bridge pinaagi sa mga elemento sa kapulisan ug municipal personnel aron mapugngan ang pag-usab sa susamang mga insidente. Gipahinumdoman usab sa hepe ang publiko nga dili magduhaduha sa pagpangayo og tabang sa pamilya, higala, o sa mga kasaligang tawo kon makasinati og bug-at nga problema o kasubo sa kinabuhi.