Mukabat na sa 585,993 ka indibidwal o 170,590 ka pamilya ang naapektuhan sa hiniusang epekto sa Habagat ug mga bagyong Luis ug Maymay sa siyam ka rehiyon.
Sumala sa National Disaster Risk Reduction and Management Council o NDRRMC, hapit 5,000 ka indibidwal ang gipailalom sa pre-emptive evacuation, samtang mokabat sa 32,000 ka tawo ang na-displace ug nagpabilin sa mga evacuation center o nakipuyo sa ilang mga paryente.
Walo na ang gikumpirmang namatay ug siyam ang nasamdan, samtang adunay mga gikatahong missing.
Samtang, 429 ka pasahero ang stranded sa walo ka pantalan tungod sa dili maayong kahimtang sa kadagatan.
Sumala ni Philippine Coast Guard spokesperson Captain Noemie Guirao-Cayabyab, 23 ka pantalan ang padayong gimonitor ug siyam ka barko ang dili pa makabiyahe.
Gipakusgan usab sa Coast Guard ang search and rescue operations, evacuation assistance, libreng sakay ug road clearing operations sa mga lugar nga naapektuhan sa kusog nga ulan ug hangin.