Nakumpiska sa Police Regional Office 10 ang kinatibuk-ang P9.7 o dul-an P10 milyones nga kantidad sa mga kontrabando ug nasikop ang 195 ka mga indibidwal sa gipahigayon nga usa ka semana nga anti-crime operations sa tibuok rehiyon niadtong Abril 23 hangtod 29, 2026.
Sa kampanya batok sa ilegal nga droga, mokabat sa 79 ka suspetsado ang nadakpan diin nasakmit ang kapin 569 gramos nga shabu ug marijuana nga mobalor og PhP3.8 milyones.
Gawas niini, 78 usab ka mga wanted person ang nasikop, samtang 54 ka nagkadaiyang armas ang narekober ubos sa operasyong “Kontra Boga.”
Nagmalampuson usab ang PRO10 sa pagsumpo sa illegal mining ug cigarette smuggling diin nakuha ang hapit P5 milyones nga kantidad sa mga smuggled nga sigarilyo.
Gipasalig ni Regional Director PBGEN. CHRISTOPHER N. ABRAHANO sa PRO10, nga magpadayon ang paningkamot sa ilang buhatan sa pagpatuman sa balaod aron masiguro ang kahusay ug kalinaw sa Northern Mindanao.