Nagpakatap og wanted posters ang mga miyembro sa Akbayan Youth batok kang Senador Ronald “Bato” dela Rosa sa daplin sa Kalayaan Avenue sa Quezon City karong Lunes, Mayo 18.
Kini misunod sa giisyung arrest warrant sa International Criminal Court batok sa kanhi hepe sa Philippine National Police.
Nabutang sa maong posters ang mga pulong nga “WANTED for crimes against humanity, Bato Dela Rosa surrender to the ICC now!” samtang sa laing poster gibutang usab ang contact numbers sa National Bureau of Investigation ug ICC aron matawagan sakaling makit-an si dela Rosa.
Sa pamahayag ni Akbayan Youth National Vice Chairperson nga si Claire Lopez, gibatikos niini ang padayon nga paglikay ni dela Rosa sa hustisya, ug giingong liboan ka pamilya sa mga biktima sa extrajudicial killings o EJKs ang padayon nga naghulat sa hustisya.
Giawhag usab sa grupo ang publiko nga makigbahin sa ilang gitawag nga “people’s manhunt” batok kang dela Rosa aron maseguro nga maatubang kini sa international justice mechanisms.
Matud pa ni Lopez, dili lamang kini pakigbisog alang sa mga biktima sa EJK kundili alang usab sa kamatuoran ug accountability sa nasud.
Sumala sa Akbayan Youth, gihimo nila ang maong aktibidad human sa kaguliyang nga nahitabo sa Senado niaging semana diin mipakita pag-usab si dela Rosa human sa pipila ka buwang pagkawala, ug giingong naprotektahan pa sulod sa Senado atol sa pagsulay sa mga otoridad sa pagsilbi sa arrest warrant batok kaniya.
Samtang, gipasiugda usab sa grupo ang ilang panawagan sa Senado nga sugdan na ang impeachment trial batok kang Bise Presidente Sara Duterte.
Sa pikas bahin, ang usa sa mga abogado ni Senador Ronald “Bato” dela Rosa, si Atty. Jimmy Bondoc, miingon nga wala sila masayod asa na ang senador karon.
Si Bondoc miingon nga naa sila sa Senado aron kontakon ang mga kawani ni dela Rosa aron atimanon ang 72 oras nga gihatag sa Korte Suprema para sa ilang kampo aron pagtubag sa mga komento sa mga respondents bahin sa warrant of arrest batok kang dela Rosa gikan sa International Criminal Court (ICC).