Nakatala ang Department of Health (DOH) og 4,633 ka bag-ong kaso sa HIV sa Pilipinas gikan sa Enero hangtod Marso ning 2026. Kini nga ihap mas taas og nwebe porsiyento kon itandi sa susamang panahon sa miaging tuig.
Sa maong gidaghanon, 1,104 ka pasyente o 24 porsiyento ang anaa na sa advanced HIV stage sa dihang nadiagnose.
Hinuon, ang natala nga average nga 51 ka kaso matag adlaw mas ubos kon itandi sa 57 ka daily cases niadtong 2025.
Ang National Capital Region (NCR) ang nagpabiling nag-una sa listahan nga adunay pinakadaghang natala nga infection nga niabot sa 989 ka kaso.
Kadaghanan sa mga bag-ong biktima kalalakin-an, diin ang pangedaron sa mga natala nagsugod sa dos (2) anyos hangtod 77 anyos. Sa kasamtangan, gibanabana nga duna na’y 288,000 ka tawo ang nagpabiling buhi nga adunay HIV sa tibuok nasud.