Kapin 20 ka tawo naangol sa magnitude 5.7 nga linog sa Central Japan

Naangol ang kapin 20 ka tawo human miigo ang magnitude 5.7 nga linog sa Central Japan sayong kabuntagon niadtong Domingo, Nobyembre 8.

Sumala sa Japan Meteorological Agency, natala ang maong pag-uyog alas 1:04 sa kaadlawon diin ang sentro nahimutang sa kasadpang bahin sa Shizuoka Prefecture nga may giladmon nga 40 kilometros. Gibati usab ang kusog nga pag-uyog sa mga silingang dapit sa Aichi, Nagano, Gifu, ug Yamanashi.

Nagbilin ang linog og mga nangabuak nga bildo ug nakalangan sa operasyon sa mga bullet train ug local lines. Walay gipagawas nga tsunami warning ang mga awtoridad ug gikumpirma usab nga walay nalaing kadaot sa mga duol nga nuclear power plant.