Gibarugan sa kampo ni Bise Presidente Sara Duterte nga dili nila intensyon ang pagpalangan sa dagan sa impeachment trial nga gipahigayon sa Senado.
Matud ni Atty. Michael Poa, tigpamaba sa legal team sa Bise Presidente, lehitimo ang tanang objection nga gipasaka sa depensa ug ginahimo lamang kini kon ilang makita nga gikinahanglan, sukwahi sa mga naglutaw nga panaghisgot sa social media human sa mga pagsupak ni Atty. Carlo Joaquin Narvasa atol sa pagdungog.
Gipasabot ni Poa nga gusto usab sa ilang kampo nga mahuman dayon ang impeachment trial aron dili na madugay ang pagdungog sa kaso batok sa ilang kliyente.
Nagtuo usab si Poa nga pareho usab sa interes sa prosecution team nga mapadali ang paghuman sa maong proseso.
Samtang, sumala kang Trial Presiding Officer Francis Escudero, posible nga mas mopaspas ang dagan sa impeachment trial sa umaabot nga mga adlaw.
Una nang gibanabana nga mahimong moabot hangtod sa walo ka bulan aron makompleto ang 92 ka adlaw sa pagdungog sa kaso.