Midepensa ang kamp ni kanhi Presidente Rodrigo Duterte atol sa unang adlaw sa confirmation of charges hearing sa International Criminal Court nga wala’y criminal intent ang mga pamahayag ni Duterte kalabot sa kampanya niini batok sa illegal nga droga.
Matud ni Nicholas Kaufman, nag-unang depensa ni Duterte, ang mga pamahayag ni Duterte gitumong sa pagpukaw sa kahadlok ug pagtuman sa balaod isip pamaagi sa pagpatuman sa kaayohan sa publiko, ug dili angay hubaron isip usa ka kriminal nga katuyoan.
Gipunting ni Kaufman, nga ang mga pasangil batok kang Duterte, lakip na ang alegasyon sa crimes against humanity nga adunay kalabotan sa gitawag nga Davao Death Squad ug sa nasudnong kampanya kontra droga, wala’y igo ug lig-on nga basihanan.
Gidugang pa sa depensa, nga ang pagsumpay sa mga istorya mahitungod sa Davao Death Squad usa lamang ka konstraksyon nga wala’y legal nga pundasyon, ug ang pagsang-at sa kaso giisip nga sayop ug adunay kalabotan sa politika.
Ang kampo ni Duterte, gibarugan nga ang kanhi Presidente angay mabalik sa pamilya niini ug sa nasud, samtang gidepensahan nga ang mga aksyon ug pamahayag niini kaniadto kabahin sa usa ka estratehiya sa pagpatuman sa balaod ug dili usa ka krimen batok sa katawhan.