Gipadayag ni Manila Rep. Joel Chua nga posibleng nakahimo og election offense si Vice President Sara Duterte kung mapamatud-an nga nakadawat ang iyang kampanya niadtong 2022 og pondo gikan sa mga Chinese nationals nga konektado sa Pharmally.
Sumala sa Omnibus Election Code, bawal sa mga langyaw ang paghatag og donasyon sa kampanya, ug ilegal usab alang sa mga kandidato ang pagdawat niini.
Dugang ni Chua, mahimong mosangpot kini sa culpable violation of the Constitution ug klarong paglapas sa election laws kung mapamatud-an nga foreign nationals ang mga nalambigit.
Base sa affidavit ni Ramil Madriaga, nga nagpakilalang kanhing aide ug bagman ni Duterte, midawat siya og milyon-milyong piso gikan kanila Lin Weixiong ug mga negosyanteng sila Tony Yang ug Michael Yang alang sa campaign activities.
Giingong gigamit ang maong pondo sa operasyon sa ISIP, usa ka non-profit nga giingong gitukod aron mosuporta sa kandidatura ni VP Sara.
Gipunto usab ni Chua nga lahi pa nga isyu kung gideklarar ba ang maong mga donasyon sa Statement of Contributions and Expenditures (SOCE) sa Bise Presidente.
Samtang, nagpabiling bukas ang House Committee on Justice sa panig ni Duterte aron tubagon ang mga alegasyon, bisan pa nga wala pa siya motambong sa mga pagdungog ug nagpasaka og petisyon sa Supreme Court aron ipahunong ang proseso.