Gipakusgan sa lokal nga pangagamhanan sa Valencia City, Bukidnon ang kampanya batok sa ilegal nga droga ug kriminalidad, samtang gipadali usab ang mga proyekto sa panglawas ug imprastraktura sa siyudad.
Sumala kang kanhi Mayor ug karon consultant Jose Galario Jr., hapit matag semana adunay madakpan sa mga buy-bust operation sa kapulisan bisan pa sa pagkunhod sa mga kaso. Padayon usab ang pagpatrolya sa kapin 100 ka force multiplier ug auxiliary force sa poblacion ug mga barangay, samtang gikatakdang sugdan sa Enero ang drug testing alang sa mga empleyado sa city government.
Sa laing bahin, gisugdan na karong Nobyembre ang pagtukod sa City Good Samaritan Hospital nga gilaumang mahuman sa Agosto 2027, nga adunay inisyal nga 50 hangtod 100 ka bed capacity. Gikatakda usab sa Pebrero 2027 ang pagsugod sa pagtukod sa bag-ong City Hall sa lima ka ektaryang luna.
Dugang pa ni Galario, ipadayon usab ang mga programa alang sa senior citizens, barangay health services ug persons with disabilities aron mapalapdan ang serbisyo sa panglawas ug suporta sa katawhan.

