Gibarugan ni Baguio City Rep. Mauricio Domogan nga nakahimo og mga paglapas si Bise Presidente Sara Duterte nga mahimong maikonsiderar isip impeachable offense.
Gipahayag niya kini samtang pending pa sa plenaryo sa Kamara ang consolidated articles of impeachment batok sa Bise Presidente.
Sumala ni Domogan, klaro sa sunod-sunod nga pagdungog sa House Justice Committee ang mga giingong sala ni VP Sara, lakip na ang betrayal of public trust ug culpable violation of the Constitution.
Kini may kalabotan sa giingong maanomalyang paggamit sa P612 milyon nga confidential funds sa Office of the Vice President ug sa Department of Education.
Lakip usab sa mga alegasyon ang kalahi-an tali sa iyang bank records ug sa iyang Statement of Assets, Liabilities, and Net Worth (SALN), ug uban pang isyu.
Gidugang pa sa Cordilleran lawmaker nga wala magpakita og klarong lakang ang kampo sa Bise Presidente aron pamatud-an o kuwestyunon ang mga alegasyon bisan pa og gihatagan sila og higayon sa komite.
Gilauman nga hisgutan sa Kamara ang reklamo batok kang VP Sara Mayo 11, diin gikinahanglan ang one-third nga boto sa mga miyembro aron mapadayon ang impeachment.