Sa ikaduhang adlaw sa hearing sa International Criminal Court (ICC), gipresentar sa prosekusyon ang gitawag nga “Kill List” o ang listahan sa mga pangalan nga giingong nalambigit sa droga nga gipasigarbo ni kanhi Presidente Rodrigo Duterte.
Sumala ni Edward Jeremy, trial lawyer sa prosekusyon, ang maong listahan maoy nahimong basehan sa sunod-sunod nga pagpamatay sa mga suspetsadong “narco-politicians” ug uban pang mga biktima, lakip na ang mga kabus ug mga bata. Gipasiugdahan sa prosekusyon nga ang “PRRD List” nagsilbing “dead list” nga miresulta sa kamatayon sa daghang indibidwal ubos sa drug war.
Gihisgotan usab sa hearing ang mga pamahayag ni Duterte kaniadto nga nagmando sa pagpatay, diin giingon sa prosekusyon nga dili kini komedya tungod sa daghang kinabuhi nga nakalas. Ang maong proseso kabahin sa “confirmation of charges” aron masuta kon duna ba’y igong basehan nga ipadayon ang pormal nga husay batok sa kanhi presidente.