Andam ang legal defense team ni Vice President Sara Duterte sa bisan unsang resulta sa botohan sa Kamara sa Articles of Impeachment nga gikatakda karong Lunes.
Matud ni Atty. Michael Poa, ilang bantayan lamang ang proseso sa plenaryo sa House of Representatives ug maghulat sa resulta sa boto.
Kung mapasa ang articles of impeachment ug ipadala kini sa Senado, andam usab ang ilang legal team sa sunod nga hugna sa proseso.
Sumala ni Poa nga adunay 16 ka mga abogado nga naglangkob sa depensa sa bise presidente, ug nagsalig sila nga makapakita og lig-on nga argumento ug ebidensya pabor kang VP Sara kung magsugod na ang impeachment trial.
Gipatin-aw usab niini nga wala silay nakita nga problema kung ang Senado ma-convene isip impeachment court, kay kini anaa sa diskresyon ug desisyon sa Senado mismo.
Dugang pa, andam si VP Sara nga motubag ug motambong kung kinahanglan siya sa impeachment court.
Sa kinatibuk-an, ang kampo sa Bise Presidente nagpabiling kalma ug andam sa sunod nga mga lakang sa proseso sa impeachment.